Kesah Kakanakan Bahari
di Gambut
Pamulaan
tadangar Gambut, orang Banjar atawa yang suah kasana pinanya talintas di
pikiran langsung tasambat tapai, baras, nasi itik, pasar Kindai Limpuar, wan
banyakai kalo lagi. Pas kuliah bahari gin ada haja kakawanan ku yang handak
minta bawakan tapai wan nasi itik Gambut (hahaha dikira bagiannya bos tapai wan
nasi itik kalo aku ne). Banyak pang
pandapat tapi yang pasti di sini pang wadah ku dilahirakan pasnya di kecamatan
Gambut, kabupaten Banjar, provinsi Kalimantan Selatan. Kesahnya ku ne
“blasteran” Gambut wan Kandangan J.
Makanyaam muha ku manis nang kaya manisnya tapai Gambut wan jua nang kaya manisnya
dodol Kandangan (eaaaaaaa rabah jamban).
Bahari
ku masih sekolah TK wan SD, saragam bawahan masih handap. Eeh mun awak putih
barasih nyaman haja dilihat tapi yang ada ne dulu pina merusak pemandangan
(hoby bajamur kesah kaya bule). Pas ku lulus di SDN 9 Gambut malanjutkan di MTsN
2 Gambut, habis tu lanjut lagi ka SMAN 1 Gambut. Intinya sakolah 12 tahun kada
kurang kada jua labih bahari tu sabarataan saraba di Gambut, ne rahasia bagiannya
lah kucing ku gin sabujurnya dari Gambut jua. Bahari tu ku badiam di jalan
Irigasi atawa jalan Harasi pang orang tarancak manyambat, kukurang labih 300
meter di subalah kiwa pasar kindai Limpuar Gambut. Rumah ku bapagar yang pakai
lawang wan jendelanya ada jua (pinanya yang mambaca ne pernah ja melihat hahaha).
Bahanu
ku takurihing saurangan mun taganang kesah kakanakan bahari. Kada paduli panas
mangantang, bahari tu katuju banar bakalayangan sampai suah tasangkut antena tv
orang (untung patah haja antenanya J).
Rasa harat banar sudah saking rancaknya manang basuntingan pas bakalayangan.
Amunnya bakalayangan tu nah dilombaakan gasan PON atawa olimpiade handakai ku
umpat jadi peserta (optimis banar ku dapat medali emas J). Suah jua bahari tu baramian
mandian di sungai Harasi Gambut, sungai bahari pina tabarasih amunnya
dibandingkan wahini. Nah yang kada kalah rami, main kalikir tapi mun yang ini
ne napakah ku takana rancak kalah tarus. Hahaha pinanya kada tapi beisi bakat
aku urusan kalikir. Auran kakayatu pang umbah bulik sakolah yang diudak wan
kakawanan.
Handak
hati bahari tu bamainan biasanya baolah saurangan ja, liwar jarang manukar yang
sudah jadi. Munnya PS atawa nilon kalayangan kada bisaam ku baulah, manggalas
bisa ja pang bagamatan. Wahini jamannya saraba praktis, sasatumat nukar tapi
itu pang jar kakawanan ku bahari tu kadada seni wan kadada kebanggaannya. Nah
ada yang wawaluhan jua kalakuan kakanakan bahari, batang pisang diulah
jujukungan wan bakayuhnya pakai tangan haja. Gratis banar, tinggal manabang
pisang di higa rumah. Ngarannya kakanakan kada paduli lagi wan panampilan, asal
hati ku himung kada paduli awakam pina bagatah.
Apa
yang dimainakan lakian, binian gin bahanu rancak jua umpatan. Mainan binian
kaya tali atawa bamasakan kadada pang pinanya lakian handak umpat bamainan
bahari tu. Sabujurnya liwar banyak kesah bahari yang unik ajaib kada sampat
tatulis. Amun “Kisah kasih di sekolah”
nang kaya lagu amang Crisye banyakai dari pengalaman saorang tapi koler nah
mangisahakan (haha kesah payu). Kesah misteri pangalaman saorang gin banyak jua
stok tapi koler jua nah ku bakisah (haha kesah koler). Bahari hp kadada pang
talihat orang baisi, apalagi hp bakamera praktis kaya wahini jadi gasan dokomentasi
tangalih sadikit. Handak share di
facebook gin kada kawa jua bahari
tu saking canggihnya. Hahaha kakanakan di bawah tahun 2000 banyak ne yang
marasaakan langsung. Di bawah ne ku pajang foto bahari diambil dari kalisi.
Diitihi
bahimat, Gambut wahini tarasa beda banar dibandingkan Gambut bahari. Misal ja
lah bahari sungai tabarasih (rasa gotong royong pinanya labih tinggian bahari)
wan bahari tu pahumaan mahijau manguning nyaman banar dilihat sakahandak hati
(wahini banyak jua dilihat tapi perumahan pang). Kaini pang pangaruh majunya
jaman di sagala aspek, pengaruh yang baik tapi yang kada baik gin ada jua. Bagamatan
tapi pasti bamacam bantuk kanangan atawa kesah tiap urang ada yang sama wan ada
jua yang kada sama. Saumpama lagu bahari tu ku pas jamannya lagu Sheila On 7, tuha
wan anum banyak yang bisa manyanyiakan. Wahini di tahun 2016 jamannya lagu
dangdut house music pinanya. Intinya dalam bahasa romantis “kada sama umur, ya
kada sama jua kesah”. Haha kayatu pang ........
Mencopy paste wan teraplikasikan ujar pepatah, “lain
dulu lain sekarang”. Bahari manuntut ilmu mulai TK sampai lulus SMA saraba
di Gambut. Umbah lulus kuliah di bidang kesehatan habisam kesahnya ku bagawe di
wadah yang jauh dari wadah kelahiran. Ujar senior di Dinkes ”ikam rif bulik ka
Banjar nang kaya hayam yang mandatangi karungkung hintalu pas mamacah bahari”.
Langsungai ku jawab sambil kurihing licik “pas ulun banar tu”. Nah habisam
kesahnya sudah dengan salamat sampai tujuan. Terima kasih kai, nini, amang,
acil, ading, kaka, dan dangsanak sabarataan yang sudah mambaca blog ulun.
Tampulu gratis ne amun ada yang handak jua babagi kesah pas kakanakan bahari,
langsung haja kada usah ragu tulis ja di komentar J.
